చంద్రబాబు ధర్మ పోరాట దీక్షకు జాతీయ నేతల సంఘీభావం

February 11, 2019 | News Of 9

National leaders are supporting Chandrababu's Dharma Porata Dheeksha. | telugu.newsof9.com

ఢిల్లీ: ఏపీ ముఖ్యమంత్రి చంద్రబాబు నాయుడు చేపట్టిన ధర్మపోరాట దీక్షకు పెద్ద ఎత్తున మద్దతు లభిస్తోంది. వివిధ జాతీయ పార్టీలు ఆయన దీక్షకు సంఘీభావం తెలుపుతున్నాయి. కాంగ్రెస్‌ అధ్యక్షుడు రాహుల్‌ గాంధీ, మాజీ ప్రధాని మన్మోహన్‌ సింగ్‌, జమ్ముకశ్మీర్‌ మాజీ ముఖ్యమంత్రి ఫరూక్‌ అబ్దుల్లా, ఎస్పీ నేత ములాయం, టీఎంసీ ఎంపీ ఒబ్రెయిన్‌, శరద్‌ యాదవ్‌ తదితరులు దీక్షకు మద్దతు పలికారు. ఏపీ విషయంలో కేంద్రం వ్యవహరిస్తున్న తీరును ఎండగట్టారు.

చంద్రబాబు కృషికి పూర్తిగా సహకరిస్తాం

మాజీ ప్రధాని మన్మోహన్ సింగ్ మాట్లాడుతూ ‘‘భారత ప్రభుత్వం ఏపీకి పార్లమెంట్‌ సాక్షిగా హామీ ఇచ్చింది. ప్రత్యేక హోదా హామీ కూడా పార్లమెంట్‌ సాక్షిగా ఇచ్చిందే. ఇచ్చిన హామీలను నెరవేర్చాల్సిన బాధ్యత ప్రభుత్వంపై ఉంది. విభజన హామీలకు అప్పుడు అన్ని పార్టీలు ఆమోదం తెలిపాయి. ప్రత్యేక హోదా సాధించుకోవడానికి చంద్రబాబు చేస్తున్న కృషికి అందరం సహకరిస్తాం’’అని అన్నారు.

ఏపీ కి సాయం చేయాల్సిన బాధ్యత కేంద్రానిదే

 జమ్ముకశ్మీర్‌ మాజీ ముఖ్యమంత్రి ఫరూక్‌ అబ్దుల్లా మాట్లాడుతూ ‘‘పార్లమెంట్‌ సాక్షిగా ఇచ్చిన హామీలను నెరవేర్చాల్సిన బాధ్యత కేంద్రానిదే. ధర్మం తప్పినప్పుడే ప్రజల్లో ఆందోళన మొదలవుతుంది. అందుకే ఆంధ్రా ప్రజలు ఇక్కడి వరకు వచ్చారు. ఓట్ల కోసం ప్రజలను, కులాలు, మతాలను విభజించి పాలించాలని కేంద్రం చూస్తోంది. దేశం సురక్షితంగా ఉండాలంటే ఈ ప్రభుత్వం పోవాలి. వ్యక్తిగత దూషణల స్థాయికి ప్రధాని దిగజారకూడదు. ప్రధాని అన్న వ్యక్తి ప్రజలకు ఇచ్చిన హామీలను అమలు చేయాలి’’ అన్నారు.

చంద్రబాబు తో మేమున్నాం

ఎస్పీ నేత ములాయం సింగ్ మాట్లాడుతూ ‘‘ఏపీ ప్రజలకు ఇచ్చిన హామీలు నెరవేర్చాల్సిన బాధ్యత కేంద్రంపై ఉంది. చంద్రబాబు వెంట మేమంతా ఉంటాం. చంద్రబాబు ఏ కార్యక్రమం చేపట్టినా ఎస్పీ ఆయన వెంటన నడుస్తోంది. చంద్రబాబు వెంట రైతులు, పేదలు, అన్ని వర్గాల ప్రజలు ఉన్నారు. వారు న్యాయం కోసం పోరాడతారు. అవసరమైతే తిరగబడతారు.

హోదా గురించి మాత్రం మాట్లాడరు

తృణముల్ కాంగ్రెస్ ఎంపీ ఒబ్రెయిన్ మాట్లాడుతూ ‘‘పార్లమెంట్‌ సాక్షిగా ఏపీకి ప్రత్యేక హోదా హామీ ఇచ్చారు. దానిపై ప్రధాని మోదీ ఒక్క మాట మాట్లాడరు. మోదీ నేతృత్వంలోని ఈ ప్రభుత్వం గద్దె దిగే సమయం ఆసన్నమైంది. మోదీ, అమిత్‌ షా ఇద్దరూ దేశ ప్రజలను గందరగోళానికి గురిచేస్తున్నారు. తన ప్రసంగాల్లో మోదీ పెద్ద పెద్ద మాటలు మాట్లాడతారు. కానీ దేశానికి మోదీ చేసిందేమీ లేదు. స్వతంత్ర దర్యాప్తు సంస్థలను ఆయన నిర్వీర్యం చేస్తున్నారు.’’ అని అన్నారు.

విభజన హామీలేవీ కేంద్రం నెరవేర్చలేదు

కాంగ్రెస్ సీనియర్ నేత, ఎంపీ జైరామ్ రమేష్ మాట్లాడుతూ ‘‘కేంద్రం సహకరించకపోయినా పోలవరాన్ని త్వరితగతిన పూర్తిచేసేందుకు కృషి చేస్తున్నారు. రాజ్యసభ వేదికగా ఇచ్చిన ప్రత్యేక హోదా హామీని మోదీ ప్రభుత్వం పెడచెవిన పెట్టింది. ఆనాడు వెంకయ్యనాయుడు ఐదేళ్లు కాదు.. ప్రత్యేక హోదా పదేళ్లు కావాలని అడిగారు. ఇప్పుడు ఆ ఊసే ఎత్తడం లేదు’’ అని అన్నారు.

ఏపీకి ఇచ్చిన హామీలు నెరవేర్చాలి

శరద్ పవార్ మాట్లాడుతూ ‘‘పార్లమెంటు సాక్షిగా ఏపీకి ఇచ్చిన హామీలు నెరవేర్చాలి. దేశం ఇప్పుడు చాలా క్లిష్ట పరిస్థితుల్లో ఉంది. రైతులు, నిరుద్యోగులు ఎన్నో కష్టాలు ఎదుర్కొంటున్నారు. ప్రధానమంత్రి ప్రతిపక్షాల ఐక్యతను ప్రశ్నిస్తున్నారు. ఎమర్జెన్సీ హయాంలో కూడా ఇలానే అన్ని పక్షాలు ఏకమయ్యాయి.

దేశంలో ప్రజాస్వామ్యం ప్రమాదంలో పడింది

శరద్ యాదవ్ మాట్లాడుతూ ‘‘దేశ ప్రధానిగా ఒక మాట చెప్పారంటే అది తూచా తప్పకుండా అమలు చేయాలి. ఆంధ్రప్రదేశ్ ప్రజలకు ఇచ్చిన మాటను ఈ ప్రధాని పెడచెవిన పెట్టారు ఏపీ ఈ దేశంలో భాగంకాదా?  ప్రధాని ఎక్కడికెళ్తే అక్కడి పాట పాడతారు ఏపీకి వెళ్తే హోదా ఇవ్వకుండేనే అబద్ధాలు చెబుతారు. ప్రధాని మోదీకి విశ్వసనీయత లేదు. ఆయన చెప్పేవన్నీ అబద్ధాలే.

మోదీని గద్దె దింపేందుకే

కాంగ్రెస్ పార్టీ అధ్యక్షుడు రాహుల్ గాందీ మాట్లాడుతూ ‘‘మా ప్రభుత్వ ప్రధాని చట్టసభలో ఆంధ్రప్రదేశ్ కి హామీ ఇచ్చారు. ఒక ప్రధాని ఇచ్చిన హామీని ప్రస్తుత ప్రధాని నెరవేర్చలేదు. నరేంద్ర మోదీ ఎక్కడికి వెళ్లినా అబద్దాలే చెబుతున్నారు.  చౌకీదార్ చోర్ అని అంతా అంటున్నారు. ప్రధాన మంత్రి రాఫెల్ కుంభకోణంలో దొంగ అని తేలారు. అనిల్ అంబానీకి వేల కోట్లు దోచిపెట్టారు’’ అని అన్నారు.

Other Articles

Leave a Reply

Your email address will not be published. Required fields are marked *